ဟိုရောက် ဒီရောက် (Mt. Emei)

Mt. Emei ဟာ Sichuan Province က Chengdu နဲ့ ကီလိုမီတာ ၁၅၀အကွာ၊ Leshan city မှာတည်ရှိပါတယ်။ အဲ့ဒီခရီးဟာဖြင့် ကျိုက်ထီးရိုးဘုရားဖူးသွားရသလိုပါပဲ။ အမြင့် ၃၀၉၉ မီတာရှိပါတယ်။ ၁ရာစုနှစ်များမှာ ပထမဆုံး ဘုန်းကြီးကျောင်းကို စတင် တည်ဆောက်ခဲ့ပါသတဲ့။ ၁၉၉၆ မှာworld natural and cultural heritage အဖြစ်UNESCO က အသိအမှတ်ပြုခဲ့ပါတယ်။

Mt. Emei တောင်ကိုရောက်ဖို့ ဂိတ် ၂ဂိတ်ဖြတ်ရပါတယ်။ ပထမဂိတ်မှာ ကိုယ်စီးလာတဲ့ကားကို ထားခဲ့၊ လက်မှတ်ဝယ်ပြီး သူတို့စီစဉ်ထားတဲ့ မီနီဘတ်စ်နဲ့ ခရီးဆက်ရပါတယ်။ ၁နာရီနီးပါးလောက်စီးရပါတယ်။ လမ်းမှာ ဆိုင်အနည်းငယ်ကလွဲလို့ လူသူနည်းပါးပါတယ်။ အိမ်အနည်းငယ် တွေ့ပေမဲ့ လူနေတဲ့ လက္ခဏာမရှိပါဘူး။ လမ်းခရီးက အတက်အဆင်းအနည်းငယ်ပဲရှိပါတယ်။ တောင်တွေကြားထဲက ကွေ့ပတ်ပြီး လမ်းဖောက်ထားတာပါ။

ဒုတိယဂိတ်ကို ဖြတ်ပြီးတဲ့အချိန်မှာတော့ လူနေအိမ်ခြေလုံးဝမတွေ့ရတော့ပါဘူး။ ဒီတခါလဲ ၁နာရီနီးပါးလောက် စီးရပါတယ်။ မန္တလေး-မေမြို့ ကားလမ်းလိုပါပဲ။ ကွေ့ကာ ၀ိုက်ကာနဲ့ မြွေလိမ်မြွေကောက် တက်သွားတာပါ။ ကွေ့ပတ်တက်ရပေမဲ့ လမ်းကကောင်း၊ ကားကကောင်းဆိုတော့ သက်တောင့်သက်သာပါပဲ။ တရုတ်ကားဆိုပေမဲ့ တောင်တက်ခရီးကို ငယ်သံပါအောင် အော်တက်နေရတာ မဟုတ်ပါဘူး။ ချီးကျူးစရာပါ။ တချို့ကတော့ ခရီးစဉ်တခုလုံးကို တောင်စဉ်အထပ်ထပ်ကျော်ပြီး ခြေကျင်ချီတက်ကြတယ်လို့ ပြောပါတယ်။ ၃ရက်လောက် ကြာပါသတဲ့။ တယ်အပင်ပန်းခံသကိုး။

တနေရာရောက်တော့ ကားပေါ်ကဆင်း၊ ခြေကျင်ယွန်းရတော့တာပါပဲ။ သဘာဝပတ်ဝန်းကျင်က သာယာလွန်းတော့ တက်ရတာ မောတယ်လို့တောင် မထင်ရသေးခင် နောက်တဆင့်နေရာကို ရောက်သွားတာပါပဲ။ ဒီတခါတော့ ကေဘယ်လ်ကားစီးရတော့မှာပါ။ ကေဘယ်လ်ကားက လူ၁၀၀လောက်ဆန့်တဲ့ အမျိုးအစားနဲ့ သာမာန်လူနဲနဲပဲဆန့်တဲ့ အမျိုးအစား ၂ခုရှိပါတယ်။ ကလူသစ်က အကောင်ကြီးကြီးကို စီးခဲ့ရတာပါ။ အသွားအပြန် ၂စီးနဲ့ဆွဲပေးနေပြီး တကြောင်းကို ၄ မိနစ်လောက်ကြာပါတယ်။ တန်းစီစောင့်ရတာက မိနစ်၄၀လောက်ကြာပါတယ်။

ကေဘယ်လ်ကားပေါ်ကဆင်းပြီး နောက်တဆင့် ခြေကျင်တလှည့် ၊ ကုန်းကြောင်းတလှည့် တက်ရပါသေးတယ်။ အထမ်းနဲ့လဲ တက်လို့ရပါတယ်။ အတက်ကို ဘယ်လောက်ပေးရမှန်း မသိပေမဲ့ အဆင်းကိုတော့ ယွမ်၂၀ပဲတောင်းပါတယ်။ စလုံး ၄ဒေါ်လာလောက်ပေါ့။ စီးကြည့်ချင်ပေမဲ့ ထမ်းတဲ့သူတွေက အသက်ကြီးကြီးတွေဖြစ်နေတာရယ်၊ ကိုယ်ကလဲ ဟိုနားရပ် ဒီနားရပ် ငေးမောချင်တာရယ်ကြောင့် မစီးခဲ့ရပါဘူး။ ဘုရားဖူးသက်ကြီးရွယ်အိုတွေအတွက်ကတော့ အဆင်ပြေပါတယ်။

သိတ်မကြာပါဘူး။ ဟိုကြည့် ဒီငေးနဲ့ တက်လာလိုက်တာ “ဘွား”ကနဲဆို ဗုဒ္ဓရုပ်ပွားတော်ကြီးမျက်စိရှေ့ ပေါ်လာတော့ ကျိုက်ထီးရိုးတောင်ပေါ် မောမောနဲ့တက်ရင်း ကျိုက်ထီးရိုးစေတီနဲ့ ရင်ပြင်ကို တွေ့လိုက်ရတဲ့အခါ ပင်ပန်းလာသမျှ ပိန်းကြာဖက်ပေါ် ရေမတင်၊ ပျောက်သွားသလိုမျိုး ခံစားရတာပါပဲ။

အမောပြေသွားတာနဲ့ ဘုရားပြေး၊ ဦးချကန်တော့လားဆိုတော့.........မဟုတ်ကြောင်းပါ။ အဝေးကနေ တဖျတ်ဖျတ်နဲ့ ဘုရားကို ဓာတ်ပုံရိုက်ရတာနဲ့၊ ကိုယ့်ဘာသာ ပဲပေးရင်း ဓာတ်ပုံရိုက်ရတာနဲ့ကို ဘုရားရှိခိုးဖို့ကိစ္စ ယာယီရွေ့ဆိုင်းထားရတာပါပဲ။ ဆင်ရုပ်ကြီးတွေအောက်မှာ ဟောခန်းတခုရှိပါသေးတယ်။ အဲ့ဒီထဲမှာ မတ်ရပ်ရုပ်ပွားတော်တဆူ ရှိပါတယ်။ အရမ်း “အရမ်း”ကို သပ္ပါယ်ပါတယ်။ ဓာတ်ပုံမရိုက်ဖို့ တားမြစ်ထားပါတယ်။ လက်ရာက တရုတ်လက်ရာ လုံးဝမနွယ်ပါဘူး။ ဥပမာ- မြန်မာပြည်မှာ ပြသွားဖူးတဲ့ “အနောက်သို့ ခရီးသွားခြင်း” ဇာတ်လမ်းထဲမှာပါတဲ့ ဘုန်းကြီးပုံစံမျိုးမဟုတ်ပါဘူး။ ခုလက်ရာက မြန်မာပြည်အနှံ့ ဘုရားစေတီတကာမှာ တွေ့နေကြ ဗုဒ္ဓဘုရားမျက်နှာတော်မျိုးပါ။ ရှေးဟောင်းလက်ရာမို့လို့ အကွန့်အညွန့်တွေ သိတ်မပါသေးတာလား မသိပါဘူး။

အားရအောင် ဘုရားကြည်ညိုပြီးတော့ ပတ်ဝန်းကျင်လေ့လာရေးထွက်ပါတယ်။ ပတ်ဝန်းကျင်တောင်တွေထဲမှာ အမြင့်ဆုံးဖြစ်တာရယ်၊ မြူနှင်းတွေဝေ့ဆိုင်းနေတာရယ်ကြောင့် ဘယ်နေရာကြည့်လိုက် ကြည့်လိုက် သာယာလှပအေးချမ်းနေတာပါပဲ။ ရှုခင်းအလှက ဓာတ်ပုံနဲ့ပြလို့လဲ မပြည့်စုံ၊ စာရေးပြလို့လဲ လုံလောက်မယ် မထင်ပါဘူး။ ကိုယ်ညံ့တာကို ၀န်မခံချင်တာလဲပါသပေါ့။

ဒီတောင်ရဲ့ရှုခင်းက ဆောင်းဆိုလဲဆောင်းမို့လို့၊ နွေဆိုလဲ နွေမို့လို့ ရာသီအလိုက်ကို အမှန်တကယ်နာမည်ကြီးပါတယ်။ အကယ်၍များ သွားခွင့်ကြုံမယ်ဆိုရင် မဖြစ်မနေသွားဖို့ တိုက်တွန်းပရစေ။

အထူးခြားဆုံးကတော့ ဘုရားရင်ပြင်တ၀ိုက် လှေခါးလက်ရန်းတွေမှာ တွေ့ရတဲ့ သော့ခလောက်တွေပါပဲ။ ပုံစံဒီဇိုင်းအစုံပါပဲ။ ခန့်မှန်းခြေ သောင်းဂဏန်းလောက်ရှိမယ်ထင်ပါတယ်။ ဘာရည်ရွယ်ချက်နဲ့ ဒီလိုလာထားကြသလဲဆိုတာတော့ မေးမကြည့်မိခဲ့ပါဘူး။ ကိုယ့်တိုးဂိုက်ကလဲ ဘိုလို ဟိုတစ ဒီတစလောက်ပဲ ပြောတတ်တာဆိုတော့ ကိုယ့်ဒုက္ခ ကိုယ်မရှာတော့ပါဘူး။

ရင်ပြင်ပေါ်မှာ သိတ်များများစားစား ကြည့်စရာမရှိပါဘူး။ ဘုရားဖူးဖို့နဲ့ ရှုခင်းကြည့်ဖို့လောက်ပဲ ရှိပါတယ်။ တောင်စောင်းနားက ကျောက်တုံးတခုခုပေါ်ထိုင်ပြီး အဝေးက ရှုခင်းတွေကို အေးအေးဆေးဆေးခံစားလိုက်ရရင် အလွမ်းဘုရင်JD လိုမျိုးလူဆိုရင် မျက်ရည်တွေ ရေတံခွန်လို တဟောဟော ကျလာလောက်တဲ့ နေရာမျိုးပါ။ ကလူသစ်ကတော့ အဆင်ပြေရင် နောက်တခေါက်လောက်သွားအုန်းမယ်လို့ စိတ်ကူးထားတာပါပဲ။